Բուժումը եւ պրակտիկան՝ մեկ տեղում

Հիվանդանոցում կկատարվի տարածաշրջանում բացառիկ՝ գլխուղեղի անոթային ստենդավորում:
Մարտի 24-ին հանրապետության նախագահ Սերժ Սարգսյանը այցելեց Երեւանի Մխիթար Հերացու անվան պետական բժշկական համալսարանի «Հերացի» թիվ 1 հիվանդանոցային համալիր, որտեղ մատուցվող բժշկական ծառայությունների որակը բարելավելու նպատակով շարունակում են իրականացվել բարեփոխումներ թե՛ կրթական, թե՛ բուժական ոլորտներում։ Սերժ Սարգսյանը շրջեց համալիրի վերաբացված նոր բաժանմունքներում, ծանոթացավ կատարված աշխատանքներին եւ մատուցվող ծառայությունների որակին։
Շրջայցի ընթացքում նախագահին ներկայացվեց, որ «Հերացի» թիվ 1 հիվանդանոցային համալիրի անմխիթար վիճակում գտնված տարածքները հիմնովին վերանորոգվել են (այս մասին տե՛ս «ՀՀ»-ի նախորդ համարում)։ Բուժման ժամանակակից մեթոդներին ուսանողներին հաղորդակից դարձնելու եւ առաջատար տեխնոլոգիաներից օգտվելու համալսարանական մասնագետների փորձի ցուցադրման հնարավորություններ ստեղծելու նպատակով վերանորոգվել են մասնաշենքի երկու հարկերը։ Այդտեղ կենտրոնացվել են վիրահատական ուղղվածություն ունեցող կլինիկաներն ու վիրահատարանները, որոնք եւս անբարեկարգ վիճակում են գտնվել։ Հիմնանորոգումից եւ վերազինումից հետո համալիրի երկու հարկում կենտրոնացվել են նախկինում ոչ բարվոք վիճակում գտնվող վիրահատական ուղղվածություն ունեցող կլինիկաներն ու ութ վիրահատարանները։

Հիմնանորոգվել եւ նոր գույքով հագեցվել է նաեւ թերապեւտիկ մասնաշենքի երրորդ հարկը, որտեղ տեղակայված են ընդհանուր թերապիայի կլինիկան, դիաբետոլոգիայի, ինչպես նաեւ պարբերական հիվանդության կենտրոնները։ Ընդհանուր ծավալով հիմնանորոգվել է 2,520 քմ տարածք, կատարվել է ավելի քան 421 մլն դրամի ներդրում։ Ֆինանսական ներդրումներն ամբողջովին իրականացվել են Երեւանի պետական բժշկական համալսարանի սեփական միջոցներով։

Բաժանմունքների վերանորոգման շնորհիվ կարդիականանա կրթական գործը. Երեւանի պետական բժշկական համալսարանի ուսանողները այսուհետ հնարավորություն կունենան տեսական գիտելիքների հիմքի վրա կառուցելու նաեւ գործնական հմտություններ։ Նորագույն տեխնիկայով համալրված նոր բաժանմունքները հնարավորություն կտան ուսանողներին մանրամասն ուսումնասիրելու վիրահատության ընթացքը ոչ միայն թափանցիկ ապակիների հետեւից, այլեւ մոնիտորների վրա։

ԵՊԲՀ ռեկտոր Դերենիկ Դումանյանը, կարեւորելով բարեփոխումների շնորհիվ ուսանողների օգտակար փորձ ձեռք բերելու հնարավորությունը, չանտեսեց նաեւ որակյալ բուժման համար անհրաժեշտ պայմանների առկայությունը. «Ընդհանուր առմամբ 180 մահճակալը, 8 վիրահատարանը եւ մյուս անհրաժեշտ պարագաները ստեղծում են բոլոր պայմանները ընդհանուր վիրաբուժության, քիթ-կոկորդ-ականջաբանության, դիմածնոտային վիրաբուժության, վնասվածքաբանության, մանկական վիրաբուժության եւ տարածաշրջանում բացառիկ համարվող՝ գլխուղեղի անոթային ստենդավորման համար»։ Եվ որպեսզի ուսանողը չտուժի, պայմանների բարելավումը չի ուղեկցվի գների բարձրացմամբ, դրանք առավել մատչելի կլինեն մյուս բուժական հաստատությունների հետ համեմատած, եւ պետպատվերով ու վճարովի բուժման հարաբերակցությունը կլինի 50/50։ «Աշխարհում համալսարանական կլինիկաները համարվում են ամենաորակյալներն ու մատչելիները»,- ասաց Դ. Դումանյանը՝ բացատրելով, որ որակյալ լինելը պայմանավորված է այնտեղ աշխատող բարձրորակ մասնագետներով, որոնք նաեւ դասավանդում են, իսկ մատչելիությունը՝ նրանով, որ պրոֆեսորներին իրենց աշխատանքում օգնում են ուսանողները, ովքեր լրացուցիչ չեն վարձատրվում։

Կրթության եւ գիտության նախարար, ԵՊԲՀ շրջանավարտ Արմեն Աշոտյանը կարեւորեց իրականացված վերանորոգման աշխատանքները։ «Դա եւս մի ապացույց է, որ Հայաստանի Հանրապետությունում բարձրագույն կրթությունը տարեցտարի զարգանում է, եւ բուհերը կարողանում են միջոցներ գտնել ապահովելու ուսուցման համապատասխան բազան», - ասաց նախարարը, ընդգծելով, որ ԵՊԲՀ-ն խոշոր դերակատար է նաեւ առողջապահության ոլորտում։ Նա վստահություն հայտնեց, որ վերաբացված ենթակառուցվածքները լավագույն կերպով կծառայեն ե՛ւ երիտասարդ մասնագետների պատրաստմանը, ե՛ւ ազգաբնակչության առողջության պահպանմանը։

Հարցեր, պատասխաններ, մեկնաբանություններ